Aqqunartitersimasut 19-it suli perulupput
Timmisartoq MD-82-imik taaneqartartoq, Spanair-imeersoq Madridimiit Las Palmasimut aallaraluarluni motoorimi aappaanik qaartoorpoq. Danmarks Radiomi tusagassiortoq, Arne Skadhede napparsimaviit ilaata silataaniit ima tusagassiivoq:
- Ministeriuneq Zapatero napparsimavimmut ungasinngitsukkut aqqunartitersimasut ilaqutaallu tuppallersariartorlugit iserpoq. Uani napparsimavimmi aqqunartitersimasut arfinillit uninngapput, taakkualu ilaata arnap ataatsip kinaanera suli ilisimaneqanngilaq. Ajunaartut 153-it ataatsimeersuartarfimmut eqqussorlugit maanna kinaassusersiniarneqarput. Spaniap Kunngia nulianilu maannakkorpiaq tassaniipput ilaqutaasut untritilikkaat tuppallersarniarlugit, tarnillu nakorsaat ikiuiniaqataasut ilassiortorniarlugit.
- Maani inuit tamarmik attortissimaqaat, pisummi assigiinngitsutigut 2004-mi peqqarniisaarniat qimuttuitsunik sisamanik qaartartumeerinerannut assigummata. Taamani soorlu aamma ajunaartut 190-it ataatsimeersuartarfimmut eqqussorlugit kinaassusersiniarsarineqarput. Taamanili 2004-mi inuit paatsiveerusimaaqaat, nunartik saassunneqarmat sulilu allanik qaartartumeerisoqassanersoq nalugamikku. Maannakkut timmisartut angallattut nalinginnaasut ilaata ajunaarnera taamanikkut pisunut aallaassutaavoq.
Madridimi, Kanariap Qeqertaanni Olympiademilu unamminerit Spaniap peqataaffigisaanni minutsimi ataatsimi ullumi nipaallisimasoqartarpoq. Timmisartoq sooq nakkarnersoq ajunaarsimasoqartillugu misissuisartut maanna paasiniarpaat.
