Aqqunarsimasut suli perulupput

Nutaarmiuni alianartumik pisoqarnerani aqqunarsimasut marluk  Nuummi Dronning Ingridip napparsimmavissuanut ippassaq pissunneqarput.

Nakorsat pisortaat Carsten Thordahl maanna KNRimi radioaviisimut nalunaarpoq aqqunarsimasut taakku marluk suli peruluttut.

- Ajorneruleriartunngillat, kisianni suli perulupput, Carsten Thordahl oqarpoq.

Politiinit Claus Risbjerg ullaaq maanna nalunaarpoq angut 20-nik ukiulik Upernavimmi eqqartuussivimmi inatsisit tunngaviusut tunngavigalugit killisiorneqarluni sassartinneqassasoq.

- Politiit inassutiginiarpaat killisiuineq ammasuussasoq, taamaattumik naatsorsuutigaarput killisiuineq naammasippat annertunerusumik paasissutissiisinnaalluta, politiit nalunaarput.

Upernavimmiilli kingusinnerusukkut nalunaarutigineqarpoq killisiuineq matoqqasumik ingerlanneqassasoq.

Politiit ullaap tungaani nassuiaateqassamaarput Nutaarmiuni qanorpiaq pisoqarsimanersoq nassuiarlugu aammalu 20-nik ukiulimmut unnerluussut qanoq ittuussanersoq nassuiarlugu.

Naalakkersuisut siulittaasuat Kuupik Kleist aamma Inatsisartut siulittaasuat Josef Motzfeldt ataatsimoorlutik ullumi ulloqeqqanut minutsini marlunni nipaallisimasoqarnissaa kajumissaarutigaat aamma pisortat suliffeqarfiutaasa erfalasuminnik qiteqqusimatitsinissaat ilanngullugu kajumissaarutigineqarluni.

Alianartumik taama pisoqarnerani toqukkut qimagaasut, nunaqqataasut allatigullu eqqugaasut misiginneqatigineqarnerat ersersinniarlugu, taama kajumissaarisoqarpoq.

Pisoq ullup ingerlanerani malinnaavigissavarput radioaviisinilu aamma tusagassaqarumaarluni.