Meerannguaq qanoq ateqassava. Aatitaaq, Naalik imaluunniit Johannes kalaallisuunngorlugu Juaanasi, Juaannasi, Juaansi, Ujuaansi imaluunniit Ujuanasi - allattaatsimik nutaanngitsumik nutaamilluunniit allallugu.
Kalaallit aqqisa nalunaarsorsimaffiat nutaaq kalaallisut qallunaatullu oqaasertalik ullumi saqqummersinneqartoq, Oqaasileriffiup pisortaa Carl Christian Olsen nalunaarpoq.
Kalaallit aqqi nalunaarsukkat katillugit 2.500-t missaaniipput siuliminnit 1.000-inik amerlanerullutik.
Naggatit kinguliat kalaallisuut nalunaarsukkat aamma 100 missaanniipput.
Siullermeerutaasumik atit Europamiusuumit Biibilimillu naggueqarlutik kalaallit taaguisarnerannut tulluussakkat kalaallit atiutaannut ilaalluinalersimasut 800-t sinneqartut ilanngunneqarsimapput, assersuut Johannes aallaqqaasiutigaarput.
- Aammattaaq atit sumiorpaluutsinut tunngassutillit tunumiusut avanersuarmiusullu taasisarnerinnut naapertuunerusumik allannissaat sapinngisamik sianiginiarneqarsimasut, Carl Christian Olsen ilisimatitsivoq.
Meeqqaminnik kuisitsiniartut taamaalillutik aterparpassuarnik qiniataagassaqalerput.
