Aqqit atugaavallaat piumaneeruttarput
Ilisimatuut oqartarput meeqqat aqqi atugaavallaaleraangata angajoqqaanngortut atermik taassuminnga atseerusukkunnaartartut.
Akerlianillu aamma meeqqavut allanertaavallaamik atserusunneq ajorivut oqaatigineqartarpoq, taamaalillunilu aqqit quleriaatut inissiortorutsigit pingajuanniittoq sisamaanniittorluunniit nuannarineqarnerpaanngorsinnaasarpoq, taamalu siullertut nuannarineqarnerpaagaluaq piumaneeruttarluni.
- Assersuutigalugu ateq Sofie nuannarineqarnerpaatut normu et-inngorsimappat taava atermik allamik toqqaasoqartarpoq, taama oqarpoq Københavnimi aqqit pillugit ilisimatooq Birgit Eggert.
Danmarkimi aqqit nuannarineqarnerpaat pillugit avammut saqqummiussoqaqqammerneranut atatillugu taanna taama oqarpoq, aterlugooq Sofie niviarsiaqqanut ateritissallugu massakkorpiaq nuannarineqarnerpaavoq.
Nukappiaqqanilu ateq Lucas Danmarkimi nuannarineqarnerpaasimavoq.
Nunatsinni kisitsit 2004-meersut naapertorlugit niviarsiaqqani ateq Ane atugaanerpaavoq nukappiaqqanullu Hans ateritinneqarnerpaalluni.
