Aqqartartunnguaq sungaartoq Canadap iluaqutigilluarsinnaavaa
Issittup imartaa pillugu Ruslandip USA-llu assortuunneranni taanna aqqartartunnguaq Canadap iluaqutigilluarsinnaavaa.
Aqqartartoq, Explorerimik - tassa ilisimasassarsiortumik - aamma taaneqartartoq, Canadami Borden Islandimut ullumi aallartinneqassaaq, sikup ataatigut, immap naqqaniit taamaallaat 150 meterinik qutsitsigisukkut, immap naqqani qaqqat qooqqullu akulloqquallugit, 300 kilometeringajaat ingerlaassalluni. Ornitani puttaaq ullut pingasut ornissavaa.
Qujagisamut taaguut "Yellow Submarine" aqqartartumut taaguutigitinneqarpoq. Taanna inuttaqanngilaq immallu naqqa tikingajavillugu angalasinnaalluni. Issittup imartaani Canadap oqartussaaffiisa killeqarfii taassuma assiliussavai.
Immat atorneqarnerat pillugu Naalagaaffiit Peqatigiit piumasaqaataat naapertorlugu, Canada uppernarsaammik Naalagaaffiit Peqatigiinnut 2013-imi tunniussisussaavoq, Issittup imartaani, immallu naqqani, Canadap suut oqartussaaffiginerai tassani allassimassallutik. Taamaaliornissaq siusinnerusukkut pisariaqarsimanngilaq, silalli pissusaata allanngoriartornera pissutigalugu Issittup imartaa maanna aqqutigineqaraluttuinnarpoq, aamma isumaqartoqarpoq, nunarsuatsinni uuliap 25 procentia suli qallorneqanngitsoq Issittup imartaaniittoq, taamaammat killeqarfiit maanna isumaqartorujussuanngorput.
Aqqartartoq inuttaqarani angalasussaq qarasaasiaq atorlugu angalassaaq, sananeqarneralu 25 millionit koruuninik akeqarpoq.
Jacop Verhoef, Canadami ujarassiuutut misissuisarfimmeersoq, tusagassiorfinnut oqarpoq, Exploreri ilimagisarluinnartut maannamut iliorsimasoq.
Nunap toqqavia Explorerip misisussavaa, qanoq isorartutiginersoq takuneqarsinnaaniassammat. Canadami ilisimatuut ilimagaat, aqqartartoq paasissutissanik tunniussilluarsinnaassasoq, taakkulu akisuallaartariaqanngillat sukkasuumillu pissarsiarineqarsinnaassallutik, taamaalilluni Canadap Issittup imartaani oqartussaaffigerusutai paasineqassammata.
