Aqqanilissaa tulleriinnik GSSip arnartai pissartanngorput
GSS Nuummeersoq ilungersungaatsiaqqaarluni aqqanilissaa tulleriinnik pissartanngornerminnik qulakkeerinnippoq arnat assammik arsarlutik pissartanngorniunnerat Ilulissani naammassimmat.
Nunaqqataat NÛK-meersut kinguaariit nikinnerannik naammassinnilersut unammineq tamaat unammillerluarput, taamaattorli dommeri naggataamik siggarmat 25-20-mik ajorsarlutik.
Mumereernermi NÛKp GSS angungajakkaluarpaa.
- Utaqqisinnaassuseqarneq aalajangiisoqaannguatsiarpoq, GSS-mi sungiusaasoq Kim Ostermann Petersen ujamminnatsitsineq naammasseriitsiartoq KNR-mut oqarpoq.
Unamminermi piffissami aalajangiisuusumi NÛK straffertinneqarpoq. Mumereernermili isertinneqartoq Simone Morsing pingaarutilinnik arlalinnik annaassivoq.
Toqqaanerit
- Måliniittumik taarsiinerput aalajangeeqataannguatsiarpoq. Simone Morsingip isersimaqqaartitatsinniit allaanerusumik periuseqarnera apeqqutaaqataannguatsiarami, Kim Ostermann Petersen oqarpoq.
Simone Morsing finalemi arsarluarnerpaatut aamma toqqarneqarpoq.
Nagdlúnguak Ilulissaneersoq bronzennappoq SAK Sisimiuneersoq 32-23-mik ajugaaffigalugu unamminerup aallartisimalaarnerani SAK målinik arlalinnik siuaqqareersoq.
SAK-meersoq Ajaaja Silassen unammersuarnermi sukataarluarnerpaatut toqqagaavoq, Ivaana Holm GSS-meersoq assersuilluarnerpaatut toqqagaasoq. NÛK-meersoq Christina V. Lange iliminut naleqarnerpaatut toqqagaavoq.
Ukiup iligiivi tassaapput: Måliniittoq Rina Møller Lorentzen NÛK, saamerlermi isuaniittoq Aviana Kâjangmat NÛK, qeqqani tunioraasoq Najaaja Lyberth GSS, saamerlermi tunorleq Panu P. Grønvold GSS, talerlermi tunorleq Josefine Gadgaard GSS, talerperlermi isorleq Nuunu Marie Lukassen Nagdlúnguak kiisalu titarnerup killinganiittoq Ivâna Meincke.
