Aqqanilinnik ukiullip tillinniat tigusaatippai
Titartakkat sukumiisut niviarsiaqqap aqqanilinnik ukiullip politiinut tunniussai paasiniaanermi pingaaruteqarluinnartumik inissipput. Aqqanilinnik ukiullip Namminersorlutik Oqartussani tillinniartoqarsimanera radioaviisimi oktobarip 24-ani tuarpaa. Nviarsiaqqallu titartagi aalajangiisumik uppernarsaataapput tillinniat marluk Nuup Eqqartuussiviani eqqartuunneqarmata.
- Titartagai isiginnaarpakka qimmeralu nassarlugu titartarsimasaa ornillugu. Erininarserianngitsorlu qimmera ingippoq nalunaarlugu nikorfaffitsinni arlaannik pisoqarsimasoq, politiit paasiniaaneranni pisortaq Johan Westen oqarpoq.
Niviarsiaraq aqqanilinnik ukiulik 1.000 koruuninik akissarsitinneqarpoq politimester Bjørn Tegner Bay-imit tunniunneqartunik, ullorlu malunnartinniarlugu inuusamik kaagiliortoqarsimavoq iffiortup paffequtinik pinnersaasersimasaanik.
- Una nersorniagarput inersimasut ilinniarfigisinnaakutsioorpaat. Politiinut attaveqarsimavoq amerlavallaat eqqarsartaasiat malillugu oqaannarani: Sussa, Bjørn Tegner Bay oqarpoq.
Nersorniarneqartorlu tunuarsimaarpasillu checkimik tigusivoq.
- Klubbimeereerluta takuakka angutit marluk Inatsisartut silataanniittut matu ammarniarpasillugu. Takusinnaavara aamma ernumarpasissut. Taava marsiinnavippakka, niviarsiaraq aqqanilinnik ukiulik KNR-imut oqaluttuarpoq.
Tillinniartoqarsimanera aqaguani radioaviisimi sammineqarpoq niviarsiaqqallu takusani ilaquttaminut oqaluttuarai. Angutaata pappiaqqanik titartaaffigisinnaasaanik tunisimavaa pappiaqqalu A-4-rat erngerluni titartaaffigai tassani titartarlugit susoqarnera tillinniallu sunik atisaqarsimanerat.
- Immaqa 15 minutsit missaliorlugit titartarpakka, niviarsiaraq oqaluttuarpoq.
Erininarserianngitsorlumi politiit tillinniat tigusaraat.
- Qaqutigoortorujussuuvoq inuit atisaannik isikkuinillu taama ersaritsigisumik eqqaamannittoqartarnera, Johan Westen oqarpoq.
Angutit marluk qaammatini arfineq pingasuni arfinilinnilu pinerluuteqarsimasunut inissiisarfimmiittussanngorlugit Nuup Eqqartuussiviani eqqartuunneqarput tassanilu niviarsiaqqap titartagai uppernarsaatitut atorneqarput. Tillinniarneq angutit taakku nassuerutigereerpaat, pineqaatissinneqarnertilli sakkortugalugu suliaq Nunatta Eqqartuussivianut ingerlateqqitassanngortillugu.
Niviarsiaqqat angajoqqaavisa kissaatigaat atiata saqqqummiunneqannginnissaa.
You are missing some Flash content that should appear here! Perhaps your browser cannot display it, or maybe it did not initialize correctly.
