Aqqaluk Lynge: Pissanganaqaaq

- Qinersineq ulloq unnuarlu sammisaramikku pissanganartorujussuuvoq, pingaarutaalu tassaavoq inuiaat USA-miittut allanngoriartornermut ingerlaartut. Taamaattumik inuinnaat akornannut pilluni allaanerujussuuvoq, Aqqaluk Lynge oqarpoq.

USA-mi inuttaasut qanimut naapillugit suut pingaartinneqarnersut malunnartikkini Aqqaluk Lyngep oqaatigaa, soqutigalugillu anguniakkavut assigiittut aamma maluginiarsimallugu.

Meeqqat siunissaat, ilinniartitaaneq, peqqinnissaqarfiullu aaqqissugaanera qineqqusaarnerni qitiulluinnarput, Hillary Clintonilu tamatuminnga aallussiniartoq maluginiarsimallugu Aqqaluk Lynge oqarpoq:

- Innuttaasut tamarmik peqqissutsikkut socialikkullu isumagineqarnissaat taassuma suliniutigimmagit tamakkua immaqa pitsaaqutaasinnaagaluarput, taamaattumik pissanganartorujussuuvoq novembarimi præsidentinngorniunnissami McCain, Romney, Hillary, Obamaluunniit ajugaassanersoq. Kisianni unammineq qanittorujussuuvoq, ukiassalerpallu aatsaat kina præsidentinngorniunnissamut partiinit tikkuarneqassanersoq paasinarsiumaarpoq, Aqqaluk Lynge oqarpoq.

Taanna New Hampshire-imi ilisimatusarfimmi Dartmouth College-imi ilinniartitsisutut ulluni makkunani ilaatigut atorneqartarpoq, marsillu qaammataani nunatsinnut utissalluni. Dartmouth College aamma ICC-p akornanni annertunerusumik suleqatigiittoqarnissaa pillugu isumaqatigiissusiorniarluni ataatsimeeqatiginnittaqattaarpoq.

USA-mi præsidentissaq ukiormanna novembarip sisamaanni qinerneqartussaavoq.