Aqqaluk Lynge: Inuit aalajangeeqataanissamut kimigiisernerusariaqarput

AFN-ip ukiumoortumik ataatsimersuarnerani 'Nunaqarfiit Atajuarlik' qulequtaritinneqarpoq. Qulequtaq inoqarfinnut tamanut pingaaruteqartoq, Aqqaluk Lynge ataatsimeersuarfiusumit allappoq.

Aqqaluk Lynge ataatsimeersuarnermi ippassaq oqalugiarami ICC-p ukiuni tulliuttuni sisamani suliassamisut aalajangersagai saqqummiuppai.

Aamma ilanngullugu oqalugiarnermini kaammattuutigaa issittup silaannaata allanngoriartupiloorneratigut inuutissarsiutitigut periarfissat nutaat ujartorneqarnerani, issittumi inuiaqatigiinnguit allanngoriartornermi eqqorneqarnissaq pillugu pilersaarusiornermi aalajangersaaniarnermilu aalajangeeqataanissamut kimigiisernerusariaqartut.

ICC-p siulitaasuata ilanngullugu kaammattuutigaa Alaskami ukiorpassuarni uuliasiorneq ingerlanneqareersimammat kalaallinut aatsaat ineriartornermik taama nalaataqalersunut misilittagaat atorfissaqartilluarneqartut, tamatumanilu suleqatigiinnissaq kaammattuutigivaa.

Aqqaluk Lynge ataatsimeersuarnermi ippassaq qalugiarmat aallartitat 2.000 missaannik amerlassusillit tusarnaarput. Ataatsimiinneq Alaskami radiukkut tv-kullu toqqaannartumik aallakaatinneqarpoq.

Alaskami ataatsimeersuarneq ullumi naammassineqassaaq.

Kattuffik AFN tassaavoq Alaskami Inuit, Yuppiit, Aleutit Eqqillillu kattuffiat. Ukiumoortumillu ataatsimeersuartitsisarnera USA-mi nunat inoqqaavisa katersuuttarfiisa annerpaat ilaagaat nunanit allamiunit aamma najuuffigineqartartoq.