Inuit Issittormiut Siunnersuisoqatigiiffiat ICC nikallornavianngilaq.
Taama ICC-p nunatsinni immikkoortortaani siulittaasoq Aqqaluk Lynge ukiortaassamut iserluaqqusiutigaluni allagaa qulequtaqarpoq.
- Decembarip qulingat tassaavoq nunarsuarmi inuit pisinnaatitaaffiisa ulluat. Ulloq taanna ukioq manna nalliussinngitsoorparput, nunat inoqqaavisa pisinnaatitaaffii pillugit nalunaarut Naalagaaffiit Peqatigiit ataatsimeersuarneranni akuersaarneqanngitsoormat. Kinguartitsingallarput, kisiannili nikallorallarnavianngilagut, Aqqaluk Lynge ilaatigut taama allappoq.
Nunat inoqqaavisa amerlanersaat kattuffeqartiterput.
Naalakkersuisunik ukiorpassuanngortuni suleqateqarsimaneq, nunap inoqqaavinit misilittagaqarfiulluartunngorsimasoq, siunissami suleqatigiinnermut toqqammaviliilluartussaasoq, tamannalu pissutigalugu ernumassuteqarpallaarani Aqqaluk Lynge.
Erseqqissaatigaa nunat inoqqaavisa Naalagaaffiit Peqatigiinni ukiuni 24-ini suleqataasimanerat sunniuteqarsimanerallu pissutigalugu, FN, nunat inoqqaavi pillugit suliaqarnermini saneqqutsiinnarsinnaajunnaarsimasoq.
