Aqqaluk Lynge: Akerliullutik taasisut pakatsissutigaavut

Nunatsinni ICC-p siulittaasuata Aqqaluk Lyngep Nunat Inoqqaavisa pisinnaatitaaffiisa Naalagaaffiit Peqatigiinni ippassaq akuersissutigineqarnerannut atatillugu naalagaaffiit akerliusut pakatsissutigai.

Canadap saniatigut Australia, New Zealand aamma USA akerliullutik taasipput. Rusland taaseqataaniarnani aalajangersimavoq.

- Naak akuerineqarnerat nuannaarutigigaluarlutigu nunasiaatilitoqqat aamma nunat inoqqaavisa pisinnaatitaaffiinik naqisimannissimasut, ilaatigut Australia, New Zealandilu takuavut.

Kisianni assorsuaq Canada pakatsissutigivarput tassami siusinnerusukkut qanittumik suleqatigisimagatsigu. Siorna nutaanik naalakkersuisutaaramik isummaminnik allanngortitsinerat assorsuaq ajornakusoorpoq.

Naggueqatigiit suleqatigiinnerannut qanoq akimmequtaatigissanersoq misissortariaqassavarput.

Kalaallit Nunaata oqartussaasui kiisalu Danmarkip aamma Nunat Avannarliit ataatsimorluinnaq suleqatigiinnerat qujassutissaraarput. Matumani naggueqatigiit Inuit kisiisa eqqarsaatiginagit, aammali Saamit eqqarsaatigalugit aqqutissiuussisimammata. Nunarsuarmioqatigiinnitsinni nunat inoqqaavisa ajornartorsiutaannut qaangiiniarnermi naqisimanninnerullu akiorniarnissaani pisinnaatitaaffittalu sorsuutiginerani isumaqarpunga taamatut suleqatigiinneq immikkut isigisariaqartoq, Aqqaluk Lynge ilaatigut taama oqarpoq.