Aqagumiit kapisilinniartoqarsinnaalissaaq
Kapisilinniarnerup aggustip aallaqqaataaniit ammarneqarnissaa naalakkersuisut aalajangeqqammerpaat.
Sunngiffimminni aalisartartut inuussutissarsiutigalugulu aalisartut kapisilittaminnik kalaaliaqqanut, neriniartarfinnut, napparsimmavinnut, hotelinut suliffeqarfinnullu allanut tunisisartut kapisilinniarsinnaatitaassapput.
Namminersornerullutik Oqartussat nittartagaanni W-t pingasut NANOQ naggat GL-imi tamanna atuarneqarsinnaavoq.
Kapisilinnik tunisisinnaanissaq akuersissuteqarnikkut pisinnaavoq, akuersissullu kommunimit pissarsiarineqarsinnaalluni.
Kapisillit Kalaallit Nunaanni pisarineqartut nunanut allanut tunineqaqqusaanngillat, aalisakkanillu suliffissuarnut tunineqaqqusaanatik.
Kapisillit Atlantikup avannarpasinnerusortaaniittut nungutsaaliorneqarnissaat matumani anguniarneqarpoq, tassa nungusaataanngitsumik kapisilinniarneq ingerlanneqartussaaammat.
Oktobarip 31-ata tungaanut kapisilinniartoqarsinnaassaaq. Ulloq taanna qaangiutereersoq kapisilinniartoqarpat akiliisitaasoqarsinnaavoq, pisanillu arsaarinnittoqarsinnaalluni.