Aqagu aqqanermut eqqartuussineq aalajangiiffiussaaq

Sisimiuni eqqartuussivimmi suliaq matoqqasumik ingerlanneqartoq ullaaq qulingiluanut nanginneqarpoq, ilaatigut toqutsisutut pasisaq killisiorneqarluni uppernarsaatillu saqqummiussuunneqarlutik.

- Tamakku tamaasa tusareerlugit Sisimiuni kredsdommeri eqqartuusseqataalu marluk maanna nalilersuileruttorput, politimestereqarfimmi inatsisileritooq Henrik Pass radioavisimut taama ilisimatitsivoq.

Toqutsisimanermut atatillugu pisuutitsisoqassanersoq, eqqartuunneqartorlu pisuutinneqassaguni qanoq pineqaatissinneqassanersoq, Sisimiut eqqartuussivianni aqagu nalunaaqutaq aqqanermut saqqummiunneqassaaq.

Toqutsisutut pasisap pisuutinneqassaguni sivisussusia killiligaanngitsumik Herstedvesterimiittussanngortinnissaa imaluunniit ukiuni ikinnerpaamik arfineq-pingasuni pineqaatissinneqarsimasunut inissiisarfimmiittussanngortinneqarnissaa unnerluussisut piumasarereerpaat.