Filmiliortoq Filippinerineersoq: Aputit iluani soqarpa?
- Filmi asanninnilersaarutaavoq, paasissaanngitsutulli misinnarsinnaalluni, filmimik allattoq filippinerineersoq Aileen Kessop KNR-mut oqarpoq.
Nunatsinni ajornartorsiutit annersaasa ilaat imminut toqunneq filmimi sammineqartut ilagaat. Isiginnaagassiamilu ingerlatsisup Lucky Blancop nittartakkatigut Youtubekkut piviusulersaarut nunatsinnut tunngasoq isiginnaareerlugu soqutiginnilerluni Aileen Kessopimut takutippaa.
- Kalaallit assut alutorigamigit. Inooriaasaat. Soorlu danskinit qanoq tiguarneqarsimanerat. Tamanna uagutsinnut assut soqutiginarami.
Kalaallit inooriaasaat isumassarsiorfigalugu
Taamaattumik filmi Nuummi pisuusaartinneqarpoq, filmimilu inuttat kalaallit inooriaasaat isumassarsianik aallerfigalugu pinngortinneqarlutik.
- Nutaaliorusukkatta, filippinerit filmilioriaasaat, ullutsinni, assigiipajaaginnalernikuugami, soorlu oqaluttuaq ataasiinnaalluni. Uagut filmiliatsinni inuttaasut allarluinnarmik avatangiiseqartikkusussimavagut, Aileen Kessop oqarpoq.
Taassumalu neriuutigaa isiginnaartut nunarput pillugu ilisimasaqarnerulerumaartut.
- Aputit iluani soqarpa? Pissutsit assigiinngitsut imminnut ilarussuuttut amerlammata neriuppunga isiginnaartut tassuunatigut paasisaqarnerujumaartut.
Isiginnaartitsisartoq Ujarneq Fleischer filmimi inuttat pingaarnerit ilagaat.
Filmip 'Nuuk' ukiaru septemberimi saqqummernissaa naatsorsuutaavoq.