Apple annerpaanngorpoq

Taamaalilluni Applep qarasaasialeriffissuaq Microsoft suliffeqarfittut naleqarnerpaatut isigineqartoq maanna qaangeraa, aviisimi Berlingske Tidendemi allaaserineqarpoq.

Apple ukiut qulit matuma siornagut ajornartorsiortorujussuugaluarpoq matuinnartussatullu siulittuutigineqaraluarluni. Kisianni Steve Jobs pisortanngormat Apple nutaanik tunisassiorluni aallartippoq, soorlu oqarasuaatinik angallattakkanik iphone-inik kiisalu qarasaasianik angallattakkanik angallattagaanngitsunillu.

Tamannalu iluaqutaavoq. Taamaalillunimi Applep Microsoft qaangerpaa, tamatumali peqatigisaanik allamik unammillerteqalerluni - taannalu tassaavoq Google.

Suliffeqarfissuit annerpaaniunnerat Microsoftip Apple-mut unammineranit, Applep Googlemut unammineranut ingerlaqqippoq, teknologimik ilisimasalik Tim Bajarin nassuiaavoq.

Taamaattorli Microsoft nunarsuarmi suli sunniuteqaqaaq - tassami qarasaasiamik atuisut quliugaangata qulingiluat Microsoft Windowsimik atuisuusarput.