Appat manniinik mannissarniarneq inerteqqutaavoq
![](/sites/default/files/styles/image_934x467/public/article_images/lomvie-sej-300609-35.jpg?itok=_jjaX4Ef)
Naalakkersuisoqarfiup Kujataani Kitsissut Avallerni appat killiffiat pillugit Pinngortitaleriffimmit tusagassiorfinnut nalunaarut innersuussutigaa, naalakkersuisoqarfiummi allaaserisaa naapertorlugu taqqavani appat ikileriarsimanerat peqqutaasut ilaat tassaasoq unioqqutitsilluni mannissarniartarneq.
Tassunga atatillugu Naalakkersuisoqarfiup timmissat illersorneqarnerat piniagaanerallu pillugu nalunaarut innersuussutigaa:
- Nunatsinni tamanit eqqumaffigeqquneqarpoq appat manniinik mannissarniarneq inerteqqutaammat Naalakkersuisoqarfiup innersuussutigissavaa, unioqqutitsinerlu akiliisitsissummik pillaatissiissutaasinnaammat, Naalakkersuisut allapput, imalu nangillutik:
- "Appap mannia kuultitut naleqarpoq", appat pillugit plakatimi oqariartaasiuvoq nutaaq, Naalakkersuisoqarfik allappoq, timmissallu pillugit "Timmissat sammilugit"-mik taallugu paasititsiniaanerup ilaatut saqqummersinneqartoq oqaatigalugu. Aasaq paasititsiniaasoqalerpoq, Ilulissani Upernavimmilu innuttaasut ilaatigut ataatsimiisinneqarlutik.
Aamma atuaruk Kujataani appaqarfik najorneeruttoq
Pinngortitaleriffiup appaqarfik Kitsissut Avalliit Kujataaniittoq 2015-imi tikillugu alakkerterpaa, innarlu tikinneqartoq timmiaqarfik timmiaqanngitsoq paasineqarluni. Innaq pineqartoq ukiuni 1992-imi, 1999-imi 2010-milu tikeqqinneqarpoq, siullermillu tikinneqarmat timmissat 1900-t missaanniissimapput, 2010-milu 619-iusimallutik.
Aalisarnermut, Piniarnermut Nunalerinermullu Naalakkersuisoqarfiup ilanngullugu ilisimatitsissutigaa timmissat pillugit nalunaarut nutarterneqaleruttortoq, tamannalu pillugu tamanut ammasumik tusarniaasutigineqaleruttortoq, siunnersuullu inuit aasaru sulinngiffeqarnissaat sioqqullugu naammassineqarnissaa naatsorsuutigineqartoq.