Appat ikinnerulerput
Nalunaarusiamili atuarneqarsinnaavoq taateraat Upernaviup avannaani amerleriarsimasut.
Appat Upernaviup avannaani manniliortartut 2002-mi kisinneqarnerannut naleqqiullugu, appat manniliortartut 2008-mi 16 procentimik appariarsimapput, tassa 115.410-ginnanngorsimallutik.
Appat manniliorfissuisa ilaat, Toqqusaq, appanit aappariinnit 100-nit 1990-ikkunni najorneqartartoq 2008-mi najorneerussimavoq, taamaasilluni Upernaviup avannaani appat manniliorfigisartagai innat marluinnanngorsimallutik.
Innaarsuit appanit najorneqartartut timmiaasa ikilisimanerinut suna pissutaanersoq ulloq manna tikillugu ilisimaneqanngilaq. Manniliorfigineqartartut ilaat, Kippaku, misissorneqarsimavoq, manniliorfigineqartartulli ilaat alla, Apparsuit, misissuiffigineqarsimanani. Apparsuarnili timmissat suli avatangiisigissaartuusut oqaatigineqarpoq.
Upernaakkut aasallu qaammataanni appanniaqqusaannginnerup nalaani pisaasartut appat, 80-it tikillugit amerlassusillit, Upernaviup avannaata appakillisimaneranut pissutaasorineqarput.
Appaqarfiit misissorneqartut marluk taateraanit inigineqartut nalunaarusiami allaaserineqarpoq, aamma innaarsuit allat arfineq- marluk taateraanit manniliorfigineqartartut paasineqarluni. Taateraat aappariit 2008-mi 5.300-juusut 1990-ikkunnut naleqqiullugu amerleriarsimasut nalunaarusiarineqarpoq.
Pinngortitaleriffimmit oqaatigineqarpoq, timmiaqarfiit ukiut arfinillit qaangiunneranni misissuiffigineqartassasut, taamaaliornikkut paasiniarneqassalluni appat sooq taama ikilisimatigisut. Appanniarfiunnginnerup nalaani unioqqutitsilluni piniartarneq paasisitsiniutiginiarlugu Pinngortitaleriffiup aamma sulissutigilersaarpaa.