Appanniartillutik ajunaangajapput

Piniartut marluk Nuummeersut appanniartillutik umiatsiaat immakkiartulersimavoq. Nuup avataani Kitsissut eqqaanni appanniartillutik ippassaq tamanna pivoq.

Umiatsiap pullattakkap assersuinerata kingunerisaanik putu angallatip sarpiisa nalaaniittoq piniartunit takuneqarsinnaasimanngilaq, umiatsiarlu immakkiartulersimalluni. Poul Hansen Nuummi politiineersoq taama ilisimatitsivoq.

Appanniarnerup nalaani anorlertukasiusimavoq, qaffianerillu annertusimaqimmata umiatsiaq kinngujartuinnavissimavoq.

Umiatsiaq kivingajaliivissoq aatsaat umiatsiamut pullattakkamut piniartut taakku marluk ikisimapput, oqarasuaammillu angallattakkamik peqarallartillutik Nuummi politiinut sianersinnaasimapput.

Politiit umiarsuaaraat qatserisartullu annaassiniarput, angutillu ippassaq ataatsinut qiteqquttorlu angerlamut apuunneqarsimapput.

- Angutit taakku marluk ajunngillat, annaasatuaraallu angallatertik, Nuummi politiineersoq Poul Hansen oqarpoq.