Aperujussuarnera savanut savaatilinnullu kingunerluuteqartoq
Nunatta kujataani apivoq. Tassa apingaatsiarpoq. Sumiiffiillu ilaanni meterimik apilluni.
Tamanna pissutsimik nutaarluinnarmik pilersitsivoq. Savaatillimmi taama apitigisarnera sungiusimanngilaat, taamaammat savat savaaqqallu qaqqami appussaaqqapput.
Joorut Knudsen Qassiarsuup eqqaralaannguani Sammisumi savaateqarpoq. Taanna 400-t missaannik savaateqarpoq, taassuma savanik 50-inik annaasaqarsimanissani naatsorsuutigaa.
- Uanga isumaqarpunga ajunaarnersuartut taaneqarsinnaasoq, taanna KNR-imut oqarpoq.
Savat toqusut qanoq amerlatiginersut suli oqaatigineqarsinnaanngitsoq
Joorut Knudsenip savaatimi ilarpassui qujanartumik nassaareqqippai, taanna qamuteralalerluni nunami isorartuumi ungalusap avataani ujaasivoq.
- Aajuku 30-t, taava sumi tamaani qulikkaartut immaqa 100-t tungaanut maannakkut isigisinnaavakka, ujaasininni takuakka ammukaassorniassavakka, savaatilik nunami qaqoqisumi savat meqquinik qinertilluni KNR-imut oqarpoq.
- Savanik ajunngitsunik qujanartumik nassaartaqattaarpunga.
Savat ilaat aputip ataani nerisassarsisinnaapput. Ilaat ipipput. Kisianni savat qanoq amerlatigisut annaaneqarnersut, savaatillit peqatigiiffianni siulittaasup, Suulut Hansenip ilisimanngilaa.
- Savaatillit ilaat savaatiminnik suli katersillutik naammassinikuunngitsut savaataat appussaarrannikuupput. Qujanartumik savat amerlanerit maannakkut angerlaassorneqarsimalerput, taanna KNR-imut oqarpoq.
Novembarimi apinera nalinginnaanngitsoq
Nunatta kujataani ukiup taamaalinerani apinera siusippoq. Taamaammat maannakkut pisoq immikkut illuinnartuusoq, Suulut Hansen isumaqarpoq.
Uanga namminerpiaq iluatsitsisut ilagisimassavaannga, tassa apinissaa sioqqutilaarlugu savat isertinnikuugatsigit.
Joorut Knudsenilli savaatini isertiaarsimannginnamigit suli ujaasigallassaaq, pilersaaruteqarporlu: Taassuma savat nammineq piginngisani, apummi nassaarigaangamigit savaasivimminukaanniarsarisarniarpai.
