Apersortinneq inuunermut nukittorsaataavoq

Kalaallisuut, naalagiarneq, ilaqutariillunilu nalliuttorsiornerit ulluni makkunani apersortittut nalaanni apersortittup puigugassarinngisaanik misigineqarput.

Apersortittarnerliuna qanorpiaq isumaqartoq? Domprovst Emma Balslev apersortittarneq pillugu ima nassuiaateqarpoq.

- Siusinnerusukkut soorlu uagut meeraanitta nalaani oqartoqartarpoq kuisikkatta naalungiarsuugatta nammineq angersimannginnatta angeqqittartugut. Isuma taanna allanngorsimavoq massakkut tassami kuissut ataasiaannarluni pisarmat angeqqinnertut taannagu maanna apersortinneq pilluaqquneqarnertut taaneqartarpoq. Taavalu meerannguullutik kuissutertik akueralugu upperisamik nassuerutiginnittarlutik, Emma Balslev nassuiaavoq.

Taanna aperaarput apersortittussat ilaat apersortikkumasannginnerat tusarneqartarmat taamatut qinersisut amerliartorsimanersut.

- Qaqutigoortorujussuuvoq ukiumut ataaseq marluk taamalisinnaasarput, soorunami aamma upperisarsioqatigiinnut allanut nuussimasut apersortinneq ajorput, apersortinneq pinngitsaaliissutaannginnami meeraq apersortikkumanngippat angajoqqaalluunniit apersortitsiumanngippata namminneq tamanna aalajangigassarivaat, oqarpoq.

Aperaarput apersortittunut apersortinneq qanoq isumaqarsinnaanersoq.

- Amerlasuut piareersarneqarnerminni upperisap suussusianik ilinniartinneqartaramik aamma inuunerminni nakooqutissatut tigusarpaat. Aammalu apersortinnerup saniatigut ilaquttat nalliuttorsioqatiginissaat apersortittunut angajoqqaanullumi pingaaruteqartarpoq, taama oqarpoq domprovsti Emma Balslev.