Apeqqutit kingusinaartumik akineqartarnerat Aleqap kamaatigaa

- Ukiup ingerlanerani immaqa 40-45-t missaannik apeqquteqarnikuuvunga. Taakkunani apeqquterpassuarni apeqqutit marlussuinnaat piffissaq eqqorlugu akissutigineqarlutik apuunnikuupput. Ulluni qulini akisoqartussaagaluarnera malinneqarneq ajorpoq. Aleqa Hammond taama oqarpoq, nangillunilu:

- Soorunami inatsisit atuuttut aallaavigalugit sulivugut sulisussaavugullu. Aamma inatsisartut naalakkersuisullu suleriaasianni allaqqasoqarpoq, inatsisartoq naalakkersuinermut tunngasunik apeqquteqartoqarpat, ullut suliffiusut qulit qaangiuppata akissuteqarfigineqarsimassasoq. Inatsit taanna malittussaavaat. Allamik inatsimmik saqqummiisoqarnikuunngilaq, inatsit malinneqartariaqarpoq, Aleqa Hammond oqarpoq.

Inatsisartut ippassaq ataatsimiinneranni paragraf 36 najoqqutaralugu apeqquteqartarnerit oqallisigineqaqqipput. Kuupik Kleist Oqaluttarfimmiit ima oqarpoq.

- Paragraf 36-mi apeqqutit piffissaagallartillugu apuunniarneqartarnerat maannakkut oqaatigiinnassavara ajornartorsiutaasoq.

Aleqa Hammondip Kuupik Kleistip oqaasii naammaginngilai.

- Malinnnaasinnaanngikkunik taava sukkanerusumik sulisariaqassapput. Inatsit pinngitsoornatik malittussaavaat. Inatsisartut suliaannik tunulliussisoqarsinnaanngilaq. Aamma pinngitsoornani pisussaavoq naalakkersuisut inatsisartut apeqqutaannut piffissaq naapertorlugu pitsaasumillu akineqarnissaat. Sulisitsisorivaatigut, taannalu aallaavigalugu inatsit malittussaavaat.

Paragraf 36 najoqqutaralugu apeqqutit piffissaq eqqorlugu akineqartarnissaat Inatsisartut siulittaasuata naqissuserpaa.

- Erseqqissaassutigissavara suleriaasitsinni paragraf 36-mi apeqqutit akineqartussaammata. Ullut nalinginnaasumik suliffiusut qulit ingerlaneranni.

Naalakkersuisut allaffeqarfianni sipaarniartoqarnera pissutaalluni apeqqutit piffissaq eqqorlugu akineqarneq ajortut, Aleqa Hammond isumaqarpoq. Oqarlunilu Naalakkersuisut siulittaasuata inatsisit malittussaagai.

- Soorunami inatsisartut siulittaasuata erseqqissartussaavaa naalakkersuisut siulittaasuanut pisussaaffiit suunerannik. Aamma pinngitsoornani taanna malittussaavaa allamik maleruagassamik sanasoqarnikuunngimmat.

Aleqa Hammond isumaqarpoq amerlavallaartunik apeqquteqarsimanani.

- Uagut inatsisartutut sulinitsinni pisinnaatitaaffipput malillugu qassinilluunniit apeqquteqarnissamik kiffaannngissuseqarpugut. Aamma taanna namminerisamik ajornartorsiutaanngilaq, sunaana ajornartorsiutigigaat? Aleqa Hammond taama oqarpoq.