Apeqquteqartarfimmut sapaatip akunnera kingulleq apeqqutit
Atorfilittat Namminersornerullutik Oqartussanit illunik akikinaarlugit pisisarnerat qanoq isumaqarfigaajuk? Aamma Kangerlussuarmi pinerluuteqarsimasunut inissiisarfiliorniarneq Danmarkip tungaanit aaqqiissutaannaagallartutut isigisariaqanngila? KNR-ip nittartagaani naalakkersuinermut tunngasunut apeqquteqartarfimmi Kuupik Kleistimut apeqqutit imaaginnavipput.
Kuupik Kleistip maanna apeqqutit akereersimalerpai ilaatigullu oqaatigalugu Kangerlussuarmi pinerluuteqarsimasunut inissiisarfiliorniarneq aaqqiissutaannaagallartutut isigigini. Ima allappoq:
- Kalaallit tungaannit partit tamarmik akornanni qanimut suleqatigiinnikkut danskit naalakkersuisui qanoq iliuuseqarnissaannik nukingisaarpavut. Maannakkullu pisut iliuuseqarfigineqariartuaalerput. Siunissaq ungasinnerusoq eqqarsaatigalugu eqqartuussiveqarnermi akisussaaffik tigorusupparput, taamaalilluta taanna uagut nammineerluta akisussaaffigilerniassagatsigu, taamaalillutalu aaqqiissutissanik piujuartussanik nassaarsiorsinnaalissalluta. Maanna aaqqiineq oqartoqarsinnaavoq aaqqiissutaagallarnerusoq – kisianni tamanna piffissap ilaannaanut atuuttussaavoq.
Tamatuma saniatigut Kuupik Kleistip aammattaaq attartortuunermit piginnittuunermut aaqqissuussineq tusaamanerlugaaqisoq oqaaseqarfigaa. Isumaqarpoq atorfillit inuinnaallu immikkoortinneqarsimanngitsut. Taamaattorli paasissutissanik amerlanerusunik ujartuivoq:
- IA-p malittarisassat paasiuminarnerusariaqarnerat aamma ullumikkut Nunatsinni namminerisamik inissiamik pisinissamut periarfissat pillugit annertunerujussuarmik paasisitsiniaasoqartariaqartoq isumaqatigaa.
Naalakkersuinermut tunngasunik apeqquteqartarfimmi www.knr.gl/inatsisartut-ni Kuupik Kleist-ip akissutai allat atuarneqarsinnaapput.
Nittartakkami aamma tassaniippoq KNR-ip naalakkersuinermut tunngasunut ullorsiutai, tassani Inatsisartunut ilaasortat Upernaakkut ataatsimiinnertik pillugu nikittaallutik ullorsiuteqartarput. Kristian Jeremiassenip Atassummeersup ullorsiutai sapaatip akunnerani matumani atuarneqarsinnaapput.
