A.P. Møllerikkut umiarsualiorfiutaat matulerpoq

Tassani sulisut 2.500-uusut ullumikkut nalunaarfigineqarput, umiarsuit 15-it sananeqartussatut inniminnerneqareersut kingullersaat 2012-imi naammassineqareerpat, suliffeqarfitsik matuneqassasoq.

- Tamanna nuanniilliuutigaarput uggoralugulu. Suliffeqarfitta sivisunerusumik atasinnaanissaa neriuutigisimagaluarparput, umiarsualiorfiup matuneqartussanngorneranut atatillugu, sulisut sinniisuunerat Per Andersen oqarpoq.

Taassuma siunissami qaninnerusumi sulisut kattuffii Dansk Metal aamma 3F peqatigalugit sulisut suliffissaaruttussat sapinngisamik ikinnerpaatinniarnissaat suliarisussaavaa. Sulisut ilaat allamik ilinniagaqatsiarnermikkut aamma ilinniaqqinnermikkut allamik suliffissarsisinnaassapput, taamaattorli inuiaqatigiinni aningaasarsiornikkut kinguariarneq pissutigalugu umiarsualiorfiup sulisuisa tamakkerlutik suliffissarsissunnissaat ajornakusoortussaavoq. Taakkua umiarsuit sananeqartussat kingulliit naammassippata soraarsinneqartariaqassapput.

Umiarsualiorfissuup pisortai ilisimatitsipput, umiarsualiorfimmut qanittumi suliffeqarfiit saviminilerinermik suliaqartussat annerumaat minnerillu 50-it missaanniittut pilersinniarneqartut. Taamaalilluni maanna sulisorineqartut 2.500-uusut amerlanersaasa suliffissaqarnissaat qulakkeerneqarsinnaassasoq.