AP: Aalisarnermik ingerlatallit peqatigiiffiat nutaaq
Peqatigiiffik nutaaq Nunatsinni aalisartut piniartullu kattuffiannut KNAPK-mut sakkortuumik illuatungiliunnertut isigineqarpoq, tassami Nunatsinni aalisarnermik ingerlatsisut annerpaat peqatigiiffimmut nutaamut ilaasortaammata, ilaatigut tassaasut Royal Greenland aamma Polar Seafood. Aalisarnermik ingerlatseqatigiit aqqaneq-marluk peqatigiiffittaamut ilaasortaapput.
Aalisarnermik ingerlatsiviit oqaatigaat, peqatigiiffiit suleqatigiiffiillu atuutereersut kiffartuussinerat naammagineqanngimmat nutaamik peqatigiiffiliorlutik.
Peqatigiiffiup anguniakkamisut aamma taavaa aalisarnerup iluani ajornartorsiutit tigussaasumik oqaloqatigiittarnikkut aaqqiiviginiarneqartassasut, aammattaarli tamanut sammisumik paasisitsiniaasarnikkut.
Peqatigiiffiliorniarnermut pilersaarutit apriilimi saqqummiunneqaqqaarmata KNAPK-p siulittaasuata Leif Fontainep ima oqaatigaa: "Soorunami akerlerinngilarput, kisianni ilaasortanik terlinganeerilluni tigusiniarsarineq akuerineqarsinnaanngilaq", peqatigiiffiliorniarnerlu KNAPK-p aningaasaqarneranik sequtseriniarnertut taallugu.
Peqatigiiffiup ullumi pilersinneqarnerani KNAPK-mi siusinnerusukkut siulittaasuusoq Peter Olsen Sisimiuneersoq siulittaasunngorpoq. Taanna KNAPK-p marsimi siulittaasussarsiornerani Leif Fontainemut ajorsarpoq.