Canadami puisit avaartarlugit pisat amiinik Great Greenlandip pisisarsimanissaa pasitsaanneqarmat, inatsisartuni partiit illuatungiliuttut aappaata, Kattusseqatigiit Partiiata siulittaasuata, Anthon Frederiksenip, Naalakkersuisunut apeqquteqaatigaa, nunatsinni puisit amiinik tigooraasartut, maannakkut 77-inik amerlassuseqarnerarneqartut, pikkorissartinneqartarnissaannik Naalakkersuisut pilersaaruteqannginnersut.
- Puisit amiisa nunatsinneersut suliarineqartarnerminni pitsaanerpaanut inissinnissaat siunertaralugu pikkorissartitsisoqarsinnaaneranik, naalakkersuisut isumaliutersuuteqannginnersut, Kattusseqatigiit partiat aperaaq.
- Tassami Kattusseqatigiit Partiianni akuersaarsinnaanngilluinnarparput, nunatsinni piniartut atukkamikkut ilungersunarsigaluttuinnartunik atugassaqartitaasut, suli ajornernik atugassaqartinneqalersinnaanerat, minnerunngitsumik Nunatta Ammeriviata puisit amiinik Canadamit akuersaarneqarsinnaanngitsumik eqqussuiuarnera eqqarsaatigalugu, Anthon Frederiksen Kattusseqatigiit Partiaata siulittaasua allappoq.