Anthon Frederiksen qinersisartunut inussiarnisaarluni kaammattuivoq

Partiillu siulersuisuuneri aamma taamaaliorput – tusagassiutitigut allagaqarlutik. Qinigassanngortittumut aalajangersimasumut saaffiginninngillat, qinersisartunulli makku kaammmattuutigaat:

Naalagaaffeqatigiinnerup iluani innuttaasut atugarisaannik assigiinnerulersitsinissamik suliniuteqarusuttut tapersersorneqarnissaat kaammattuutigaat, aamma:

Namminersorneq pillugu Ataatsimiititaliarsuup suliaasa piaartumik nanginneqarnissaanik suliniuteqartut, nunamik piginnittussaatitaaneq pillugu sulianut tunngasut kinguarsaqqinneqaratik ingerlaqqinnissaat tapersersorneqassasut.

Folketingimi avannaamioqatigiit ingerlaqqinnissaat tapersersorneqassasut, aamma:

Arfanniartarneq pillugu Kalaallit Nunaata toqqaannartumik ilaasortanngornissaanik suliniuteqartut tapersersorneqassasut, kiisalu:

Eqqartuussiveqarneq pillugu suliniutit piaartumik naammassineqarnissaannik suliniuteqartut tapersersorneqassasut, tassa Kattusseqatigiit Partiiat inussiarnersumik taama kaammattuivoq.