Inatsisartuni ilaasortat amerlavallaaqaat. Taama isumaqarpoq Inatsisartuni ilaasortaq Anthon Frederiksen Kattusseqatigiit Partiianneersoq.
Taassuma kissaatigaa Inatsisartunut ilaasortat maannakkut 31-usut 23-nut imaluunniit 25-nut ikilisinneqassasut. Taamaattumik Inatsisartut ukiamut ataatsimiilerpata ilaasortat ikilisinneqarnissaannik siunnersuuteqarniarpoq.
Tamanna Anthon Frederiksenip KNR-ip internetikkut naalakkersuinermut tunngasunik apeqquteqartarfianut akissummini oqaatigaa. Anthon Frederiksenip akissutai allat www.knr.gl/inatsisartut iserfigalugu atuarneqarsinnaapput.
Politikeri alla maanna apeqqutissinnut akissuteqarnissaminut piareersimavoq. Sapaatip akunnerani matumani Augusta Salling Atassummeersoq apeqquteqarfigineqarsinnaavoq. Apeqquteqarniaruit www.knr.gl/inatsisartut iserfigiinnariannguaruk.