Anthon Frederiksen: Atuarfinni Arto-p unitsinneqarnera akuersaarnanngilaq

Nittartakkamik Arto-mik meeqqat inuusuttullu atuarfimminni atuisarnerisa unitsinneqarnera akuersaarneqarsinnaanngitsoq, Kattusseqatigiit siulittaasuat, Anthon Frederiksen, isumaqarpoq.

- Meeqqat inuusuttullu nittartakkamik atuisarnerat aningaasartuutaasutut oqaatigineqarsinnaanngilaq, nittartakkamillu atuisarneq killillersorneqartariaqanngilaq, Anthon Frederiksen oqarpoq nangillunilu: - Nittartakkani isersimasinnaaneq paasisassanik ilisimasanillu aallerfiusarpoq, taamaammat meeqqat inuusuttullu taamatut killilersorniarneqartariaqanngilat.

Kalaallit Nunaanni ilinniagaqarnermi attaveqatigiiffik, ATTAT, oqarpoq, nittartagaq meeqqanit inuusuttunillu nuannarineqarluartoq, Arto, nunatsinni meeqqat atuarfiini ilinniarfinnilu internetikkut isaaffigineqarluartartoq akisuallaartoq.

Inerisaavimmi pisortap tullia, Søren Porsbøl, oqarpoq, atuarfinni internetikkut attaveqartarnermi aningaasartuutit 60-80 procentii nittartakkamut Arto-mut atuinerusartut.