Anthon F. :Immikkut ittumik ataatsimeersuarnissaq pisariaqarpoq
Taamatut piumasaqarnerminut tunngavigisaa tassaavoq, naalakkersuisunut apeqqutigisani, Royal Greenlandip akiitsuinut aalisartut akilersueqataanersut.
Hans Enoksen, 6. oktober 2008, akissuteqaammini ilaatigut allappoq:
- Tulaassisussaatitaanerup kingunerisaanik aammalu Royal Greenland A/S-ip saniatigut ingerlatseqatigiit ikittuararsuit nunami nioqqutissiorfinnik ingerlataqarnerisa kingunerisaanik, aalisartortagut Royal Greenland A/S-ip saniatigut annikitsuinnarnik pisaminnut tuniaaffissaqarput. Nangillunilu:
- Aalisartut toqqaannanngikkaluamik Royal Greenland A/S-ip akiitsuinut akilersueqataasut.
- Naalakkersuisut siulittaasuata taamatut akissuteqarluni oqarnermini uppernarsisippaa, tassalu aalisartut Royal Greenlandip akiitsuinut akilersuisut, taanna saneqqukkuminaatsorujussuarmut inissippoq, Anthon Frederiksen radioaviisimut oqarpoq.
2009-mut aningaasanut inatsit siullermeerlugu Inatsisartuni oqaluuserineqarmat, Kattusseqatigiit Partiiannit piumasarineqarsimanerarpaa Royal Greenland immikkut ataatsimeersuartariaqartoq.
- Taanna alajangiusimavarput, tassami ilumoorsinnaanngilaq, Royal Greenlandip akiitsuminut aalisartut akilersuisissappagit, Anthon Frederiksen oqarpoq.