Anorersuup biilit containerillu nikisikkai

Illoqarfiit pingaarnersaanni ippassaq ullumilu anorersuarpoq. Innaallagiaq qamittoorput biilillu arlallit kussinermut nakkarlutik.

Illoqarfiit pingaarnersaanni anoraasuaq ulussaarsuartut sakkortutigisoq ippassaq ualikkut aallartippoq.

Ippassaq unnukkut nalunaaqutaq qulit missaani anoraasuaq ulussaarsuartut sakkortutigisoq sekundimut 44 meterinik sakkortussuseqartoq, DMI KNR-imut paasissutissiivoq.

Anori ualikkut kingusissukkut sakkortusiartulerpoq, nunasarnerullunilu.

Inuit illup iluaniiginnarnissaat pisariaqanngitsumillu angalasoqannginnissaa politiit kaammattuutigaat.

AAMMA ATUARUK Nukissiorfiit Nuummi qamittooqqanera misissoraat

Inunnik ajoqusertoqarsimanngitsoq Kalaallit Nunaanni Politiit KNR-imut paasissutissiissutigaa. Biililli arlallit aqquserngup sinaanut ingerlaarsimasut pingasunngornermi ullaakkut takussaapput. Biilimmi 20-t missaanniittut pingasunngornermi unnukkut kussuserut sisusimapput.

Nuup Bussii aqqusengit quatsersimanerannik aamma unammillernartorsiorput, taamaammat bussinik ingerlaneq marlunngornermi nalunaaqutaq 16.30 unitsinneqarpoq. Bussit ullumi nalunaaqutaq 10.30 aatsaat ingerlaqqilerput.

Ullaap tungaani anori suli sakkortuvoq, nalunaaqutarlu qulingiluat eqqaani illoqarfiit pingaarnersaanni innaallagiaaruppoq.

Taamaallaallu innaallagiaaruttoqanngilaq, Nukissiorfiimmi imermik kissartumillu pilersuinera aamma eqqugaavoq.

Illoqarfiit pingaarnersaanni nalunaaqutaq ataatsinut innaallagiaqaqqilerpoq, sumiiffiilli ataasiakkaat suli innaallagiaqaratillu imeqarnatik kissartoqanngillat.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat