Anorersuarnera pissutigalugu timmisartuussinissat taamaatiinnarneqartut

Timmisartuussinissamut pilersaarutit sinnerisa nalinginnaasumik ingerlanneqarnissaat naatsorsuutigineqarpoq.

Marlunngornermi ualikkut aatsaat anorikilliartulernissaa naatsorsuutigineqarpoq, tamatumalu kingorna timmisartuussinissat aallarteqqinneqassapput. Tamatuma aamma kinguneraa Københavnimut aallarnissaq marlunngornermi nal. 21. 25 aatsaat pisussanngormat. Air Greenland tusagassiorfinnut nalunaaruteqarluni taama allappoq.

Timmisartuussinissat ullumi unitsiinnarneqarneranni ilaasussat 500-nit amerlanerusut eqqorneqarput, ajoraluartumillu tamatuma aamma kingunerissavaa ilaasussat Danmarkiliartut ilaat aatsaat sisamanngornermi ulloq 25. februaari apuuffissaminnut apuussinnaassammata.

Ilaasussat eqqorneqartut angalanissamik allannguutaat pillugit Air Greenland’imit sms’imik nassinneqarlutilluunniit angalatitsivimminnit mailimik tigusaqarlutilluunniit sianerfigineqarsimassapput.

Nalornissuteqarnermi Air Greenland’i attavigineqarsinnaavoq, oqarasuaammut 34 34 34-mut.