OL-imut peqataaqqaartoq: Annilaanganaqaaq
Sisorartartoq Laila Friis Salling Danmarkimeersuni siullersaalluni ukiuunerani OL-ertoqarnerani halfpipemi freestylemi peqataasoq aallartilluaraluarpoq.
Anngunniunnermi sisunermini siullermi kukkunani apuukkaluarpoq, ilioriasaarnernilli takutitsinngilaq.
Sisortartoq nunatsinneersoq sisunermi tulliani kingullermilu taamaaliorniarluni pilersaaruteqaraluarpoq, taamaaliunnginnerminili orlusoorpoq.
- Sisunermi tullermi tamakkiisumik takutitsiniaraluarpunga, ajoraluartumilli orlusoorpunga, Laila Friis Salling taama oqarpoq.
- Sisunermi siullermi pisarnittut iliuunnarpunga. Sisunermi tullermi ilioriasaarnernik allanillu takutitsiniaraluarpunga.
- Angusarali naammagisimaarpara nuannaarlungalu. Allamik piumasaqarsinnaagunanngilanga, sisortartoq oqarpoq.
AAMMA ATUARUK Laila Salling halfpipemi kingulliup tullinngortoq
OL-imi peqataaqqaartutut isiginnaariarlutik takkussimasorpassuit killitsissutigai.
- Inuit isiginnaariarlutik takkussimasut taama amerlatiginissaat ilimaginngilluinnaraluarpara.
- Pissanganaqaaq annilaanganarlunilu. Suli sajulaarpunga. Misigisaq nuanneqaaq, Laila Friis Salling taama oqarpoq.
Peqataasunit 24-nit normu 23-nngorpoq. Aqqaneq-marluinnaat ingerlaqqipput.
- Naatsorsuuteqarpallaanngilanga. Top-24-t akornanniinnissara anguniagaralugu oqartuaannarnikuuvunga.
/ritzau/