Anngunnissaq ajornakusoortorujussuussangatippaat
- Nunarsuarmi pissartanngorniunnissamut anngunnissaq ajornakusoortorujussuussaaq, nunanut allanut unammisartut sungiusaasuat, Jakob Andreassen, Sermitsiami taama issuarneqarpoq.
Kalaallit Nunaat Amerikap nunavittaani assammik arsarluni unammersuarnerni kingullermik unammigami Chilemut ajugaavoq, kalaallit ajuunnermik ataatsimik ajugaagamik, Canadamiulli pikkorissorsuarnik arsartartoqarsinnaammata ajornarsinnaassaqaat.
Puljep aappaaniittut tassaapput Brasilia, Cuba, Den Dominikanske Republik aamma Uruguay.
Kalaallit Nunaat ingerlalluassaguni normu 3-nngorniunnermi Cuba Brasilialuunniit unammissavaa.
- Kalaallit Nunaata Cuba ajugaaffigisimanngisaannarpaa, soorunamilu ajugaaniassaagut, sapinngisarpullu tamaat nunarsuarmi pissartanngorniunnissamut Kroatiami pisussamut anngunniassalluta, sungiusaasoq Jakob Andreassen Sermitsiamut oqarpoq.
