Anngiortumik eqquseriartarnerit ilisimasakinnermik pissuteqartarput
Tamakkua tamarmik uumasunit nungunnissaannut uloriagineqartunit pisuupput, taamaammallu Naalagaaffiit Peqatigiit isumaqatigiissusiaat, CITES naapertorlugu nunanut assigiinngitsunut eqquteqqusaanngillat, Danmarkimullu eqqunneqarnissaannut akuersissummik peqarani eqquteriaraluarneqarsimammata arsaarinnissutaapput.
Akileraaruserisut akuttungitsunik issittumiit tammajuitsuliat eqquteqqusaanngitsut aamma naammattoortaraat, nakkutilliisoqarfimmi atorfillip, biolog Niels Nielsenip oqaatigaa.
Taanna naqqup iluanut alakkaaqatigaarput. Naqqup iluani Niels Nielsenip poortugaq poortoqqissaarsimasoq puuiaramiuk nannup amia naammassillugu suliarineqarsimannginnami tippattoq nassaaraa. Nannullu amiata nassiunnerani pappialartaani atuarneqarsinnaavoq tupiunerarlugu 2007-imi nassiunneqarsimasoq, taamaalilluni paasineqarsinnaavoq anngiortumik Danmarkimut eqquteriaraluarneqarsimasoq.
Niels Nielsen oqaluttuarpoq ukiumut tallimat qulillu missaanni Kalaallit Nunaanneersunik arsaarinnittariaqartarlutik politiinullu suliassanngortillugit. Qilalukkat aarrillu tuugaavinit sanaat arsaarinnissutigineqakkajunnerusut, Niels Nielsen oqarpoq, erseqqissaatigalugulu uumasut assigiinngitsut pisataannit sanaat Nunatsinniit annisseqqusaanatillu Danmarkimut eqquteqqusaanngitsut. Arsaarinnissutigineqartartulli amerlanersaat maleruagassanik inatsisinillu ilisimasaqannginnermik pissuteqartartut Niels Nielsenip oqaatigaa.
Arsaarinissutigineqarsimasut nunat tamat isumaqatigiissutaat CITES pillugu, uumasullu nungunneqarnissaannut uloriagineqartut pillugit ilinniartitsinerni atorneqakkajuttarput.
