Annerusumik ajoqusertoqanngilaq
Meeqqat 30-t sinneqartut sulisullu arlallit Ballerupimi fritidsklubimeersut unnuaq Sverigimiit sakkortuumik misigisaqareerlutik Danmarkimut tikipput. Nunatsinni nalunaaqutaq naapertorlugu unnuaqeqqaraa, bussi ilaaffigisaat Sverigimi aqqusinersuakkoortilluni ajutoorpoq, qujanartumilli annerusumik ajoqusertoqanngilaq.
Ajutoorneq pivoq aqqusinersuarmi Helsingborgip Engelholmillu akornanni.
Meeqqat 37-t inersimasullu arfinillit sinileruttortut bussi sukkasuumik ingerlaartilluni aqqusernup sinaanut sisoorpoq. Sulisut ilaata Bettina Schmidtip ajutoorneq ima oqaluttuaraa:
- Soorlu piviusuunngitsutut malunnarpoq, tassami tamatta sinngukkatta. Tassanngaannaq aqquserngup sinaaniilereersimavugut 100 meterillu missaanni sisoorsimalluta. Bussilu uppissimavoq. Siullermik ajunnginnerlunga maluginiaqqaarpara, taava meeqqat ajunnginnersut misissupallallugit. Paasivarput annerusumik ajoqusertoqarsimanngitsoq.
Bussimi ingerlatitsisup bussip igalaavi aserorpai, ilaasut tamarmik anisinnaaniassammata.
- Taava tamatta anivugut kinguninngualu ambulancet takkussuupput, Bettina Schmidt oqaluttuarpoq.
Ilaasut tamarmik Helsingborgimi napparsimaviliaanneqarput. Tassani nakorsamit misissorneqarput paasinarsivorlu annersumik ajoqusertoqarsimanngitsoq. Meeqqat ilaat annikinnerusumik ajoqusilaarsimapput, annerusumilli ajutoorneq quarsaarutigisimagaat nakorsaq svenskiusoq oqaluttuarpoq. Taava ajutoortoqartillugu ikiuigasuartartut aggersarneqarput.
Nalunaaqutaq qulingiluat qaangilaaraa meeqqat sulisullu napparsimmavik qimassinnaanngorpaat. Bussinullu allanut ilaallutik Danmarkiliaanneqarput. Taamaallaat meeqqat marluk napparsimavimmiiginnarput aappaa qaratsaminik sajuppillatsitsisimammat aappaalu seeqqumigut ajoqusersimammat.
Suna ajutoornermut patsisaanersoq suli paasineqanngilaq. Bussinik ingerlatitsisoq danskiusoq Sverigimi politiinit apersorneqareerpoq ullumilu danskit politiivinit apersorneqartussaavoq.
