Annertuumik innarluutilinnut tapersersortissanik pikkorissaasoqalersoq

Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsenip, annertuumik innarluutilinnut tapersersortitut ilinniartitaanerup Qaqortumi ingerlanneqarneranut atatillugu ilinniartut sapaatip-akunnerata tulliani pulaassavai.
Allattoq Mads Lynge
januaarip 28-at 2015 05:57

Innarluutilinnik sullissisut 17-it Kujataani ulluni makkunani pikkorissaleruttorput, ulluinnarni sulisooreersunut pikkorissaasoqarluni. Sullitat aallaavigalugit sullissinermi sakkussanik immersuisoqarnissaa pikkorissartitsinermi pingaarnertut siunertaavoq.

Annertuumik innarluutilinnut tapersersortitut ilinniartitaaneq Ilaqutariinnermut, Naligiissitaanermut Isumaginninnermullu Naalakkersuisoqarfimmit aningaasaliiffigineqarpoq, IPIS-ilu, tassa Innarluutillit Pillugit Ilisimasaqarfik Siunnersuisarfiutigisoq, Perorsaanermik Ilinniarfilu, SPS-ilu suleqatigiillutik aaqqissuussaralugu.

22-t allagartartaareerput

Innarluutilinnut tapersersortitut ilinniartitaaneq Qaasuitsup Kommuniani siullermik 2014-imi ingerlanneqarpoq, ilinniarnermillu naammassillutik allagartartaartut tassannga 21-usimallutik.

Pikkorissarlutik ukioq manna aallartittut holdit aappassaraat, Qaqortumilu tassa ingerlanneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq