Anne-Mette Rasmussen pingasuinnaat soqutigisimagaluarpaat.

Unnussiornissat ussassaarutigineqaraluaqisut, nerlerit tinguinik savaaqqamillu sivisuumik siatamik neqerooruteqaraluartut, Nuummiut pingasuinnaat peqataaniarlutik nalunaarsimammata taamaatiinnartariaqarsimallugu, hotelip pisortaa, Marianne Rasmussen oqarpoq. Taassumalu oqaatigisinnaannginnerarpaa sooq soqutiginnittoqanginnersoq. Anne-Mette Rasmussenilli bilitsissani utertinneqarsinnaanngimmat iluatsillugu sisamanngormat Nuummukarpoq, ullaarlu aatsaat angerlamut aallarluni.

Hotel Hans Egedep Anne-Mette Rasmussenip oqalugiarnissaa, "Natomi qullersanngortussap nuliatut" ussassaarutigigaluarpaa. Unnussiuaarnernilu ministeriunerup nuliatut misigisani, kiisalu tv-kkut nangeqattaartuliami "Vild med Dans"-imi peqataanini eqqartorniarsimagaluarpai.

Tamakkuali Nuummiut pingasuinnaat tassa tusarnaarusussimagaluarpaat.

Nato-mi qullersanngortussap nulia ippassaq arfernik takornariaraluarpoq, nalaatsorlunili aamma arfernik takusaqanngitsoorpoq.