Anne-Marie Konstantinilu Grækenlandiliaqqissinnaalerput

Dronning Margrethe ulluni makkunani Grækenlandimi angalaarpoq. Tusagassiortunik Athenimi ippassaq katersortitsinermi Grækenlandip kunngiusimasullu Konstantinip aamma nuliata, Dronning Margrethep nukaata, Anne-Mariap, imminnut qanoq pingaaruteqartigisimanerat eqqartorpaa, ukiorpassuit attaveqatigiissimannginneq taamaalilluni kipitinneqarluni.

Dronning Margrethe oqarpoq, nukkani ningaanilu Grækenlandimi sukkulluunniit maanna angalaarsinnaaqqilernerat nuannaarutigigini, tamannalu taakku inuunerannut nuannersumik allanngortitsissagunartoq qularutiginnginnerarpaa.

- Nukara ningaaralu sukkulluunniit piumalleraangamik Grækenlandiliarsinnaanngorput. Tamanna nuannaarutigeqigaat takusinnaavara. Nuannaangaaramik soorluluunniit ukiunik qulinik inuusussiallattut, danskit grækerillu tusagassiortuinut Kunngip Umiarsuaani, Dannebrogimi, Dronningi oqarpoq.

Dronningip Grækenlandimut pisortatigoortumik tikeraarnini kipitissavaa, seeqquni saamerleq suliaritikkiartorlugu Danmarkiliartariaqaleruni.