Anitsisartup qullaatitai Europamut anngutissangatippaat

Islandimi qaqqap anitsisup, Grimsvötnip, arsakut pavungarsuaq qullaatitai Europap silaannartaanut sapaatip-akunnerata tulliani anngussinnaapput.
Allattoq Mads Lynge
maajip 22-at 2011 18:50

Ilisimatuulli ilimagaat timmisartuussisarnernut eqquinerluppallaassanngitsoq.

Air Greenlandilli nalunaarutigaa Danmarkimiit Danmarkimullu timmisartortitsinissaq  taamaatiinnarneqartoq.

Tamanna pillugu annertunerusumik paasisaqarusukkaanni Air Greenlandip nittartagaa alakkarterneqarsinnaasoq, Air Greenlandimit nalunaarutigineqarpoq.

Islandikkoorlutik Amerika Avannarlermut angalasut pilersaarutitik aamma allanngortittariaqassavaat.

Naak qaqqap innermik anitsisup Grimsvötnip silaannarmut qullaatitai, 15 kilometeritut qutsitsigisumut aniatinneqaraluartut, Europami silaannakkut angallannermut eqquigallarnavianngilaq.

Qaqqat innermik anitsisartut pillugit immikkut ilisimasalik Johanne Schmidt taama oqarpoq.

Illoqarfiit inoqarfiillu allat qaqqap innermik anitsisup eqqaaniittut arsakunit iserisserput.

Grimsvötnimi innermik massakkut anitsineq, qaqqap innermik anitsisartup Eyafjallajökullip siorna anitsineranut sakkortuneruvoq.

Eyafjallajökull siorna anitsimmat Europami silaannakkut angallanneq ulluni arfinilinni eqqorneqarpoq, timmisartuussinerit taamanikkut unitsinneqaraluarmata.

Arsakut Grimsvötnimeersut Skotlandimut aqagu anngussinnaassapput:

- Sila massakkutut iinnassappat, Tuluit Nunaata sinnera, Frankrig, Spaniallu avannarpasinnerusortaa sisamanngorpat tallimanngorpalluunniit eqqorneqarsinnaassaaq, silasiortut oqaatigaat.

Ilisimatuulli tassa ilimagaat Europami silaannakkut angallanneq siornatut eqqorneqarnerlutsiginavianngitsoq.

- Anitsinermi qullaatitat angallannermik eqquinerlussinnaapput, killeqartumilli, Magnus Tumi Gudmundssonip, Islandip universitetiani professorip oqaatigaa, nangillunilu:

- Innermilli anitsinerup sakkukilliartornera malugaarput, sulili sakkortoqaaq, Grimsvötnillu 1873-imi anitsineranut sanilliullugu anitsineq maanna sakkortunerusoq oqaatigalugu.

Anorip ukioq manna allamut samminera pissutaalluni arsakut Europamut anngussinnaasut annertuallaarnavianngitsut ilimagineqarpoq, Islandip silaanartaaniinnerusoq ajornartorsiutaanissaat ilimagineqarluni.

Aamma atuaruk