Anisinneqartartut A/S INI-p akisussaaffigai
-Inissiaatileqattigiiffiup INI-p aqutsinermini ajornartorsiutigisarpaa inuit akiliisimanngeriarlutik anisitaagaangata Politimesteri nunatsinniittoq anisitsinermi peqataajumaneq ajormat, inissamik allamik tunineqanngippata. Politiit anisitsiumaneq ajormata silamut anisitsiinnasinnaanngilagut, Susie Kristiansen oqarpoq.
Nangipporlu:
-Ininik annerusunik, immaqa tallimanik arfinilinnilluunniit initalinnik, nassartariaqartarpugut, taakkunanilu ineeqqani katersorlugit ineeqqamik tunisarpavut.
Aamma una eqqarsaatigineqartariaqarpoq inissiigaangatta inissinneqartut akiliineq ajorput, tassa imaappoq, najugaqarfinni tassani aningaasat amigalertarput, taakkulu nammanneqartarput allani najugaqartunut.
-Anisitaasut ilaatigut ukiorparujussuit nuuttaqattaarneqartarput, anisivissorsinnaanngilavummi.
-Ajornartorsiut annertusiartortutut nalilerparput, kisianni soorunami aamma siunnersuiniarsarisarpugut, soorlu anisitaasimasut aggersartarpavut matuersaatinik nutaanik tunisussanngoraangatsigi, Susie Kristiansen oqarpoq. Imalu nangippoq:
-Anisitaasussanut paasissutissiissutit kommuninut Inissiaatileqatigiiffiup qaammatit tamaasa nassiussuuttarpai - kommunit ataasiakkaat qaammatikkuutaartumik ataatsimeeqatigineqartarput, kisianni assigiinngiiaartorujussuuvoq,
-Inissiaatileqatigiiffimminngaaniit isigalugu isumaqarpunga anisitaasut inisseqqinneqarnissaat najugaqartut allat akiligassarinngikkaat, politikerit tamanna isummerfigisariaqassavaat.
-Kommunit ilaat suleqatigisarpavut, soorunami ataatsimeeqatigisarpavut, isianni uani anisitsilernermi ajornartorsiut annertunerusumik suleqatigiissutiginngilarput, soorlu assersuutigiinnarlugu maani Nuummi. Kommunini allani imaassinnaavoq suleqatigeereersut. Assersuutigiinnarlugu Kujataani imaappoq anisitsinnginnermi kommunit ilaatigut akiliipallattarput, imaluunniit inissiiviugallartussanik ikiuussinnaasarput, Susie Kristiansen oqarpoq.
Inersimasut 44-t meeqqallu sisamat kiilerini inissianilu iluarsagassani Nuummiinnaq inissikkallarneqarsimapput.
