Aningaasivissuaq 300 kiiluusoq tillippaat

Aasianni Politiit Amutsivik Sisak Teknik-imut tillinniarsimasunik ujaasipput, ujaasinerminnilu innuttaasut ilisimannissinnaasut attavigerusullugit. Aasianni politiit sinnerlugit Karl Christensen-Kajusen nalunaarpoq.

Tillinniarneq sapaatiugaa unnuap qeqqata missaaniit  ataasinngornerup ullaavani nalunaaqutaq arfernup akornanni pisimavoq. Aningaasivissuaq 300 kiilunik oqimaassusilik aningaasanik 40.-50.000 koruunit akornanniittunik aamma angallatinut piginnittussaanermut uppernarsaatinik arlalinnik imaqarpoq.

Aningaasivissuaq annillugu assartuutinik kaassuartakkanik atorluni assartorneqarsimassasoq politiit ilimagaat.

Innuttaasut kikkulluunniit tillinniarnermik takunnissimasinnaasut imaluunniit Sisak Teknik-ip eqqaani pisunik pasinapiluttunik takunnissimasinnaasut Aasiaat Politiivinut ornigullutik sianerlutilluunniit attaveqarsinnaapput.

Oqarasuaat 89 42 22 imaluunniit mobili 53 51 22 sianerfigineqarsinnaapput.