Aningaaserivinnut sillimmasiinernut Grønlandsbanken peqataaqqissaaq
Taamaattorli tamanna aaqqissuussinermit kingullermit akikinneruvoq.
Aningaaserivinnut sillimmasiissutitut periarfissiissut Bankpakke 1, septembarip naanerani atorunnaarpat, Grønlandsbanken aaqqissuussinermi nutaami peqataassaaq.
Grønlandsbanken tamatumunnga peqataanissaminut 6 millionit koruuninik akiliissasoq, Sermitsiami allaaserineqarpoq.
Taamaalilluni aaqqissuussinermut siullermut 2008-mit 2010-mut atuuttumut, 40 millionit koruuninik akeqartumut sanilliullugu aningaaserivik akiliinikinnerussaaq.
Tamannali aningaaserivimmit nangaanartoqartinneqarpoq:
- Aningaaserivittut ingerlalluartutut ikiorserneqarnissamillu pisariaqartitsinngitsutut, taamatut akiliisariaqarnerput uggornarpoq. Taamaattorli isumagisariaqartut allat pineqarput, Grønlandsbankip pisortaa Martin Kviesgaard, Sermitsiamut oqarpoq.
Taanna isumaqarpoq aningaaserivinnut aaqqissuussinernut taamaattunut peqataanikkut nalorninartorsiornerit pinngitsoorneqartartut. Tamannalu aaqqissuussinermut peqataannginnermit pitsaanerusoq.
Aningaasatigut ajornartorsiorneq ukiualuit matuma siornagut aallartinnerata kingornagut Grønlandsbanki nutaanik sullissarpassuaqalerpoq.
- Ukiuni arlaqalersuni sullitavut aatsaat taamak amerleriartigipput, Martin Kviesgaard oqarpoq, sullitamilli qanoq amerleriartiginerat oqaatigiumanagu.
