Aningaaserivimmi ujajaariarluni aningaasat aqqusinermi siaruarterai
Angut utoqqaliarsaartoq USA-p naalagaaffiisa ilaanni Coloradomi aningaaserivimmi juullinnginnerani ujajaavoq. Kisianni aningaasaateqarnerugumalluni ujajaarpasinngilaq.
Aqqusinermi aningaasanik pappiaqqanik siaruartiterisimavoq, saneqqutanilu juullisiorluaqqusarsimallugit. USA-mi tusagassiuutit taama allaaserisaqarput.
Angut utoqqaliarsaartoq qaamasumik amilik pineqartoq Coloradomi politiit uppernarsarpaat. Angutip Colorado Springsimi Academy Bank sioorasaarilluni ujajaaffigaa. Sunali sakkorisimaneraa naluneqarpoq.
Angut aningaasanik qanoq nalitutiginersut naluneqartunik tillippoq.
- Aningaasanik puussiamit miloriussisaqattaalerpoq, juullisiorluaqqusisaqattaalerlunilu, isiginnittuusoq illoqarfimmi radioqarfimmut oqarpoq.
Angut 65-inik ukiulittut David Wayne Oliveritut kinaassusersineqartoq politiit paasissutissiissutigaat. Angut Starbucksimi kaffisorniartarfimmi aqqusinermi pisup kingorna tigusaavoq. Tigusarineqarnermini eqqissisimavoq.
65-inik ukiulik tigusarineqarnermini sakkulisarpasinngitsoq politiit illoqarfimmi tusagassiuutinut oqaluttuarput.
Ujajaaffiup eqqaaniittut aningaasanik tillinneqartunik aningaaserivimmut utertitsiniarsimasut takunnittuusoq oqaluttuarpoq. Dollarsilli tusintilikkuutaat tammartut politiit aviisimut Denver Postimut uppernarsarpaat.