Aningaaserivik saassunneqarmat arlallit toqutaapput
Afghanistanip kangisissuani illoqarfimmi Jalalabadimi aningaaserivimmi saassussisoqarmat inuit 18-it toqutaapput, allallu 70-it ikiligaallutik. Talibanikkut saassussinermut akisussaasuunerarput.
februaarip 19-at 2011 15:32
Jalalabadimi napparsimmaviit anginersaanni pisortaq, Saifullah Khan Ebrahimkhid, oqarpoq, politiit arlallit toqutaasunut ilaasut.
Angutit sakkulersorsimasut Kabulimi aningaaseriviup Jalalabadimi immikkoortortaanut isaallutik igeriaqattaarmata suna tamarmi aallartippoq. Aningaaserivik sakkutuunit isumannaallisaasunit kinguninngua unguneqarpoq.
Politiit sakkutuullu aningaasarsiassatik Kabulimi aningaaserivimmut tassunga aasarpaat.
Afghanistanip kangisissua assorsuaq perulluliorfiusarpoq. Tallimanngormat arlaleriarluni saassussisoqarmat inuit aqqaneq-marluk toqutaapput. Illoqarfimmi Khostimi politiit qullersaqarfiata qanittuani biiliniit qaartartumeerisoqarmat inuit qulingiluat aamma toqutaapput.
