Aningaaseriviit malinnaavigineqarsinnaanngussapput
Inatsisissaq siunnersuutigineqarpoq nunarsuarmi aningaasatigut ajornartorsiornerup nalaani Savalimmiuni bankip, Eik Banki-p, aningaasaqarnermigut ajornartorsioreersorlu.
- Kalaallit Nunaanni tamanna annerusumik immaqa malugineqanngikkaluartoq, savalimmiuni pingasoriarluta bankit ajornartorsiortarnerat pitsaanngitsumik misilittagaqarfigaarput. Kingullermillu banki ataaseq nunarsuarmi aningaasatigut ajornartorsiornerup ingerlanerani eqqorneqarpoq, folketingimi ilaasortaq republikanerininngaanneersoq, Høgni Hoydal oqarpoq.
Savalimmiuni aningaasaqarnermut ministeri Jóannes Eidesgaard Eik Bankip paasissutissiisarnerata killeqarnera pillugu siusinnerusukkut uparuareerpoq, taamaattumillu inatsit allanngortinneqartariaqartoq, Høgni Hoydal oqarpoq.
- Siullermik bankit aningaasatigut inissisimanerat annerusumik paasisaqarfineqartariaqarpoq, taamaalilluni ajornartorsiummik pilertoqassappat nakkutilliisoqarfik nalunaarfigineqarsinnaaniassammat. Taamaalillilluta sillimaniarnermik pilersitsisinnaassaagut pinngitsoortitsisinnaajumalluta, Høgni Hoydal oqarpoq.
Siunnersuut malillugu nakkutilliisoqarfiup ataavartumik nalilersuutai pisortat misissorsinnaanngussavaat. Atlantikup avannaani suleqatigiit 2005-imi tassunga assingusumik siunnersuuteqaraluarput - itigartinneqartumilli.
- Arlaleriarluta oqaatigisareerparput kalaallit aamma savalimmiormiut politikeriisa nunaminni bankit qanoq inissisimanerat pillugu paasissutissanik pissarsisinnaasariaqartut. Tamannali maannamut iluatsissimanngilaq - inatsisisamilli siunnersuummik maanna saqqummiussaqassaagut neriuppugullu maanna iluatsikkumaartoq, taamaalillutik Kalaallit Nunaanni aamma Savalimmiuni pisortat bankit aningaasaqarnerat pillugu paasissutissanik eqqortunik pissarsisinnaanissaat qulakkeerneqassammat. Tamannami pisariaqarpoq aningaasaqarnitsinnut aningaasaqarnerullu ineriartorneranut pingaaruteqarluinnarmat, Høgni Hoydal oqarpoq.
