Aningaaseriveqalernissaq taperserneqarpoq
Nunatsinni illoqarfiit sisamat Qaqortoq, Nuuk, Sisimiut Ilulissallu kisimik realkredit atorlugu anigaasanik taarsigassarsiniarsinnaaput. Illoqarfiit sinneri periarfissaqanngillat. Realkredit-imut taarsigassarsigaani ukiut 30-it angullugit erniakitsunk taarsigassarsisoqarsinnaavoq, akerlianik illoqarfiit mikinerit Grønlandsbankimut taarsigassarsippata taamaallaat ukiut qulit taarsersuinissaq periarfissaavoq, erniallu qaffasinneroqalutik.
Assersuutigalugu Narsami piginneqatigiilluni inissialiortoqarusukkaluarpoq, aningaaserimmulli taarsigassarsiniarsinnaaneq aporfiuvoq.
-Illoqarfinni mikinerni realkredit periarfissaagaluarpat piginneqatigiillutik inissiaatiliorniaqatigiit ingerlaanarsinnaagaluarput, erniakitsumik ukiuni 30-ni taarsersuisinnaagaluaramik. Taamaammat nunatsinni assigiimik periarfissaqartariaqaraluarpoq, tassanilu nunatta namminerisamik aningaaseriveqalernissaa periarfissatsialaagaluarpoq, Kista P Isaksen oqarpoq. Nunatsinni kommunit sisamaananngorpata Grønlandsbankip massakkit periutsini allanngortinnianngikkaa kujataani kommunit ilisimatinneqarsimapput.