Aningaasat tillissimasatik annaasussanngorpaat
Tunesiami præsidenti uppisitaasoq Zine al-Abidine Ben Ali, nulialu, Leila Trabelsi Tunesiami pikisitsinerup kingorna nunamiit qimaasariaqarsimapput.
- Maannakkut aamma Saudi-Arabiamut qimaatinnatik, naalakkersuisuugallartut naapertorlugit miliuunerpassuit naalagaaffimmiit tillissimasamik ilarpassui annaasussanngorpaat.
Tunesiami naalakkersuisuugallartut saaffiginissutaat akuersaarlugu, præsidentiusimasup nuliatalu EU-mi aningaaserivinnut toqqortorsimasaat attorneqarsinnaajunnaassasut EU-mi nunanut allanut ministerit isumaqatigiissutigaat.
Tunesiami naalakkersuisuugallartut aamma præsidentiusimasoq taassumalu ilaqutai qimaasimasut Interpolikkut ujarpaat, naalagaaffiup aningaasaataanik tillissimasutut unnerluullugit.
Ben Ali ilaqutaalu pisoorsuartut amigaateqaratik inuusimasut tusaamaneqarpoq, sapaatillu akunnerisa kingulliit marluk ingerlaneranni ilaqutariit paffimmiui, pinnersaataat nunanilu tamani kortit akiliutigisinnaasaat Tunesiami TV-kkut takutinneqaqattaarput.
Tusatsiakkat naapertorlugit aamma Ben Alip nulia gultimik annertuumik nassarluni nunamiit qimaasimanerarneqarpoq.
