Aningaasat tapiissutit napparsimmaveqarfinnut iluaqutaaqaat

Karen Elise Jensenip Danmarkimi aningaasaateqarfiata nunatsinni Peqqinnissamik Pisortaqarfik 12½ miliioni koruuninik 2004 -mi tapiissuteqarfigaa, qujanartumik aningaasat taakku ullumikkut ima iluaqutaatigaat, nunatsinni napparsimmaviit 16-iusut akornanni aqqaneq-marluk tarrarsuinermi atortui qarasaasialerlugit digitalisererneqarput.

-Tassa ima paasillugu, nakorsanik immikkut ilinniagalinnik sinerissami napparsimmaviit pisariaqartitsigunik, assilisatik napparsimmavinnut allanut sukkasoorujussuarmik nassiussinnaanngorpaat, taama nassuiaavoq Marianne Arnfjord, Peqqinnissami Pisortaqarfiup immikkoortuani pisortaq, qarasaasialerinermilu aamma pisortaasoq.

Tarrarsummik assilisat naammassiniariaraangata napparsimmavinnut allanut naassiunneqarsinnaalissapput imaluunniit Sanamut, tamannami siunertaavoq, taama nassuiaavoq Marianne Arnfjord.

Sinerissami napasimmavinni immikkut ilinniagalinnik nakorsaqanngilaq Sana-mili taamaattoqarpoq. Tassa sineriissami nakorsat kissaatigippassuk Sanamiittup assit misissussagai, ingerlaannaavik isiginnaalersinnaavai.

Aamma assit Rigshospitalimut nassiunneqarsinnaapput, pisariaqartitsineq naapertorlugu tassani misissorneqariarlutik nakorsanik immikkut ilisimasalinnik nalilersorneqarsinnaallutik. Aningaasaateqarfik Karen Elise Fond 12 ½ mio koruuninik siunertamut uani pineqartumut aningasaliisimasoq aamma nunatsinni inuit peqqissusaannik misissuinermut siornatigut aningaasalereersimavortaaq.

Uumannap, Qeqertarsuup, Qasigiannguit Illoqqortoormiullu nappasimmavii kisimik digitaliserneqarnissaminnut amigaataasut, Marianne Arnfjord oqarpoq.

Tassa Karen Elise Jensen-ip aningaassaateqarfia katillugit 25 mio koruuninik nunatsinni Peqqinnissaqarfimmut maannamut tapeereersimalerpoq.