Aningaasat millionilikkaat Nunatsinni ilisimatusarnermut

Pinngortitaleriffik ilisimatuunngorniarluni ilinniartitaanernut Danmarkimit 9,7 millionit koruuninik aningaasaliiffigineqarpoq. Ilinniartitaanerit taakku taaneqartarput ph.d. aamma post.doc ilinniarnerit. Kalaallit Nunaanni ilisimatusarnerup ineriartortinneqarnissaanut, aammalu ilisimatusartartunik qammaanernut aningaasaliissutigineqartut atorneqassapput.
Allattoq Mads Lynge
februaarip 18-at 2013 07:03

Siunertanuttaaq taakkununngarpiaq Ilinniartitaanermut Ilisimatusarnermullu Naalakkersuisoqarfik Pinngortitaleriffimmut 2,1 millionit koruuninik aningaasaliissuteqarpoq.

- Aningaasaliissutit issittumi ilisimatusarnernut, aamma Danmarkip Kalaallit Nunaatalu akornanni ilisimatusarnikkut suleqatigiinnernut, siuarsaataassaqaat. Taamatut ilinniartitseqqittarnerit Kalaallit Nunaata siunissaanut ilisimasatigut piginnaasatigullu siuarsaaniarnernut iluaqutaassaqaat, Pinngortitaleriffiup pisortaa, Klaus Nygaard, oqarpoq.

Ilisimatusarnernut aningaasaliissutaasartut aqunneqarnerat Kalaallit Nunaanni ilisimatuussutsikkut misissuisarnerit pillugit Ataatsimiititaliarsuup ukiup naanerani atorunnaarsinneqarnera peqqutaalluni Pinngortitaleriffimmut nuunneqarput. Qallunaat issittumi ilisimatusarnernut aningaasaliissutigisartagaat taakku aningaasanut inatsisaatigoortumik aningaasaliiffigineqartarput.

Aningaasaliissutigineqartut katikkaanni 2013-imi Ph.d.-rlutik ilinnialersinnaassapput sisamat Post doc-ilu ataaseq.

Ilisimatusariaatsini sammivinni tamaginneersut qinnuteqarsinnaatitaapput.

Qinnuteqarfissaq kingulleq tassaavoq apriilip ulluisa 15-iat 2013.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq