Aningaasat isertinneqartut 1 millioni pallippaat

Haitimi nunap sajorujussuarneranit eqqugaasunut 222.391 koruunit nalunaaquttap akunnerisa sisamat ingerlaneranni tusarnaartitsinermi isertinneqarput.

Tusarnaartitsinermut bilitsit tusarnaariat katillugit 900-t pisiarimmatigik isertitaqaataanerpaapput, kisianni aamma Røde Kors nakkaatitsivilerluni katersuiniarmat isertitsiviulluartut Kalaallit Røde Korsiata ilisimatitsissutigaa.

Paamiuni sapaatip akunnerata naanerani aamma Haitimi eqqugaasunut ikiuiniartoqarpoq. Kalaallit Røde Korsiata nuna tamakkerlugu katersuiniartitsinerani nipilersortartut arfinillit akeqanngitsumik nipilersorput. Paamiuni Inuit Ataqatigiit imeruersaatinik tuniniaapput, sinneqartoorutillu katersiniarnermut aamma tunniunneqarlutik. Tusarnaartitsinermi tassani 22.259 koruunit isertinneqarput, Kalaallit Røde Korsiatalu kontoanut ikineqarlutik.

Aaqqissuussinerit taakku marluk annertuut pereermata nuna tamakkerlugu katersuiniarnermi isertinneqartut 1 millionit koruunit pallippaat.

- Kalaallit Nunaat torrallaavutit, Kalaallit Røde Korsiat taama nersualaarivoq.